Hans Messner und sein "Kärntner Genderer"

Hans Messner, Kärntner Autor und Metallkünstler aus Paternion, hat uns einen besonderen "Gender-Leckerbissen" geschickt - vielen Dank! Den dürft ihr euch nicht entgehen lassen :-)

Gendern in Kärnten: Monn, loss dos Weibliche in dir zue!
(2012: Zum „Jahr der Frau“)

I was nemma, wors die Werbung, worns die Politika oder worns irgendwelche Marketingstrategen von de Hondelskettn, de uns vor aniger Zeit eingflüstat hom: Männa, losts das Weibliche in eich zue. Auf guet Karntnarisch hasst des, doss i in mir sölba a Frau vasteckt hob und de soll i hiaza zuelossn?!

Guet, i bin a neigieriga Mensch, i hobs vasuecht! Zerst hob i mia im Fernsehen die Stuhlprobleme von der Barbara Karlich samt ihrer Lösung anghurcht. Donn hob i mi hingsetzt, hob meditiert, bin in mir sölba vasunken – ohne Wein! Schwöre! Und des werds ma des vielleicht nit glabn, oba i bin Stunden später ols denkende Frau wieda aufgwocht.
Dos gibt’s! A denkende Frau im Körpa von an Monn, dos mueß ka Widerspruch sein. I waß jo inzwischn, von wos i do red!
Mei persönliche Vaänderung hin zum Weiblichen daschreckt mi gachamol. Zum Beispül donn, wenn i gonz unvahofft in Gschirrspüler ausramen anfong. Dos war ma frieha nit passiert. Daschrockn bin i a, wie i ma kürzlich in olla Herrgottsfrueh stottn Gsicht die Ochseln ausarasiert hob.
Natürlich hob i schon längst amol vasuecht wieda in mei männliche Rollen zruck zu schlupfen. Oba dos geht nit. Zue 100 % zruck geht nit. Es waret a ka Frau, de a Wochen de Ochseln rasiert, nexte Wochn de Fiaß rasiert und donn vier Tog long ihre Toge hot, so bled, doss sie donn her geht und in an Kerpa wechselt, in den sie sich jeden Tog a noch den Bort rasiern mueß.
Jo! Und so hob i mi… mit da ibamächtigen Frau in mir obgfundn. Wos solls?
Guet, hiaz schau i bein Palmers nemma lustvoll in die BH-Obteilung, sondern eha neidisch. Stott Championsleague mit Bayan München schau i im Fernsehn hiaz Rosamund Pülcha. I man, wenn man wüll, donn geht’s schon!
Total vaunsichat bin i, weil i auf amol den Georg Clooney gern sig.
Männer! Ihr seggts, i hob mi dron gegwehnt, i loss die Frau in mir zue.
Lei drei Sochn mochen ma schon Sorgen:
Ersten: Seit vuriga Wochn gfolln ma de Liada von Hansi Hintaseer.
Zweitens: I kenn mei persönliche Tampoo-Größe noch imma nit.
Und drittens: I mueß mi bein BIPA imma so beherrschn, doss i ma kane Slip-Einlogn kaf.

© Hans Messner, September 2011

zurück